फाल्गुन १८, काठमाडौं - स मो लाङ ल्होछारको अवसरमा तामाङ सेवा केन्द्र नेपालमा ल्हाप्सो पूजा तथा लाङ ल्होछार कार्यक्रम सम्पन्न भयो । सुविगाउँ कपनमा आयोजित कार्यक्रममा बौद्ध धार्मिक परम्परा अनुसार लामा गुरुहरुबाट पूजा पाठ गरिनुका साथै अवतारी लामाबाट वाङ समेत प्रदान गरिएको थियो । 

विहानै देखि सुरु भएको उक्त ल्हाप्सो पुजामा उल्लेखनीय जनभागिता रहयो । विशेष गरी सोलु, खोटाङ, ओखलढुङ्गा लगायत जिल्लाका तामाङहरुको बाहुल्य रहेको यस संस्थाले विगत ९ वर्षदेखि नै निरन्तर प्रत्येक वर्ष ल्होछार मनाउँदै आएको छ । 

ल्हाप्सो पूजा समापनपछि विभिन्न तामाङ गीत/सेलोका साथ सँस्कृतिक कार्यक्रममा मनोरञ्जन लिएका थिए ।