एभरेष्ट म्याराथुन विजेता फूर्वा तामाङ सम

जेष्ठ २३ – काठमाडौं । सातौं तेन्जिङ हिलारी एभरेष्ट म्याराथुन विजेता फूर्वा तामाङ आज राजधानीमा सम्मानित भएका छन् । तामाङ सेवा केन्द्र नेपालले उनको ऐतिहासिक सफलताले तामाङ समाजलाई नै गौरवान्वित पारेको भन्दै आज एक कार्यक्रमको आयोजना गरी सम्मानित गरेका हुन् ।

तामाङ सेवा केन्द्रको कार्यालय सुविगाउँ, कपनमा आयोजित सम्मान कार्यक्रममा प्रमूख अतिथि हेराल्ड डग्लस जेम्सले प्रशंशा पत्र तथा नगद रु. ३३,०३४/- प्रदान गरी सम्मानित गर्नु भएको हो । त्यस्तै केन्द्रका अध्यक्ष एवं कार्यक्रमका सभापति कर्ण तामाङ लगायत उपस्थित सबैले खादा ओढाई बधाई एवं शुभकामना व्यक्त गरे ।

गत मे २९ का दिन सोलुखुम्बुमा भएको म्याराथुन प्रतियोगितामा देश विदेशका सयौं प्रतियोगिहरुलाई पछि पार्दै प्रथम स्थान ओगट्न उनी सफल भएका थिए । ३ घण्टा ४० मिनेट ४७ सेकेण्डमा दौड पूरा गर्दै उनी पहिलो भएका हुन् । त्यस्तै उनका दाजु राम कुमार तामाङले पनि दोस्रो स्थान हासिल गरेका थिए ।

खोटाङ जिल्ला वाकाचोल गाविस, झाँकृवास स्थायी घर भएका तामाङ हाल सोलुखुम्बुको लुक्लामा बस्दै आएका छन् । सम्मानित भएकोमा अत्यन्त खुसी भएको र आगामी दिनमा ऐतिहासिक कार्यहरु गर्न आफूलाई थप हौसला मिलेको उनले बताए । आयोजकलाई धन्यवाद दिँदै उनले तामाङ समाज र देशका लागि आफूले सक्दो सहयोग गर्ने प्रतिबद्धता समेत व्यक्त गरे ।

कार्यक्रममा अध्यक्ष कर्ण तामाङ, प्रमूख अतिथि हेराल्ड डग्लस जेम्स, सोलु एफ एमका निमा पाख्रिन, द्धितिय उपाध्यक्ष ङिमा दावा तामाङ, तामाङ समाज डटकमका रमेश तामाङ लगायतले शुभकामना मन्तव्य राखेका थिए ।     

कार्यक्रममा अन्य एभरेष्ट समिटरहरुलाई समेत सम्मानित गरियो । सम्मानित हुनेहरुमा तुल बहादुर तामाङ, ङिमा दावा तामाङ, तिर्थ तामाङ लगायत छन् ।